Airflow ئایه‌رفلۆ چییه؟
ئایه‌ر فلۆ كه به گشتى دووناوى زانستى هه‌یه ئه‌وانیش بریتین له (MAF و MAP). هه‌ڵده‌ستێت به پێوانى بارسته‌ى هه‌وا بۆ ناو ژوورى پستۆن. ئه‌مه‌ش بۆ ئه‌وه‌یه كه كۆنترۆڵى ڕێژه‌ى هه‌وا و به‌نزین بكرێت كه بتوانرێت به ته‌واوه‌تى نزیك بكرێته‌وه له ڕێژه‌ى 14.7:1. ڕێژه‌ى بارسته‌ى هه‌وا كه ئایه‌ر فلۆ ئه‌یپێوىت ده‌نرێت بۆ عه‌قڵى ئۆتۆمبیل هه‌تاوه‌كو عه‌قڵه‌كه بزانێت ڕێژه‌ى چه‌ند به‌نزین بكاته ناو ژوورى پستۆنه‌وه له ڕێگه‌ى نۆزڵه‌وه. هه‌روه‌ها ده‌بێت ئه‌وه بزانین كه چڕى هه‌وا ده‌گۆڕێت به‌پێ ى پله‌ى گه‌رمى و په‌ستانه‌وه ئه‌مه‌ش ئه‌وه ده‌رده‌خات كه چڕى هه‌وا ده‌گۆڕێت به پێ ى پله‌ى گه‌رماى كه‌ش و هه‌وا یان ئاستى به‌رزى ناوچه‌كه به‌پێ ى به‌رزى له‌سه‌ر ئاستى ڕووى ده‌ریا یان ئه‌گه‌ر هه‌واى په‌ستێنراو بنێرێت بۆ ناو ژوورى پستۆن له ڕێگه‌ى تۆڕبۆ یان سوپه‌ر چارجه‌وه له‌به‌ر ئه‌وه ئایه‌ر فلۆ به‌رده‌وام هه‌ڵده‌ستێت به‌ڕێككردنه‌وه‌ى ڕێژه‌ى پێویستى هه‌وا ئه‌مه كارى سه‌ره‌كى ئایه‌ر فلۆیه. ئایه‌ر فلۆ په‌یوه‌ندیه‌كى ته‌واوى له‌گه‌ڵ سێنسه‌رى ئۆكجین هه‌یه (جۆزه‌ى صالنصه) كه پێكه‌وه به ته‌واوى كۆنترۆڵى ڕێژه‌ى هه‌واو به‌نزین ده‌كه‌ن.
چۆن بزانین ئایه‌ر فلۆ كێشه‌ى هه‌یه؟
- له‌كاتى سلۆلى یان زه‌ختى كه‌م به‌نزین زۆر سه‌رف ده‌كات و له‌كاتى زه‌ختكردن بزوێنه‌ر هێزى نى یه و به‌نزین كه‌متر سه‌رفده‌كات.
- مه‌كینه له سلۆلى ئه‌یله‌رزێنێ.
- دووكه‌ڵى ڕه‌ش ده‌كات.
- بۆنى غازى خنكێنه‌رى ده‌بێت.
- كاتى گۆڕینى گێڕ هه‌ڵه‌ى تێدا درووست ده‌بێت.
- داگیرسانى گڵۆپى بزوێنه‌ر له‌ناو داشبۆرد
چاره‌سه‌ر چى یه؟
ئه‌مه‌یان ده‌بێت كه‌سى شاره‌زا فه‌حسى بكات به‌م ڕێگانه:
- ئایه‌ر فلۆ ده‌توانرێت له ڕێگه‌ى ده‌رمانى تایبه‌ته‌وه پاك بكرێته‌وه ئه‌مه‌ش بۆ ئه‌وه‌ى بگه‌ڕێته‌وه بۆ حاڵه‌تى ئاسایى.
- پێویسته سه‌یرى ڕێڕه‌وى هه‌وا بكرێت بزانرێت هیچ لیكێك هه‌یه یان نا.
- له‌ڕێگه‌ى جیهازى كۆمپیوته‌ره‌وه كێشه‌كه دیاریده‌كرێت.
له‌ڕێگه‌ى ئامێرى تایبه‌ته‌وه فه‌حسى وایه‌ره‌كانى بكرێت.
له‌پاش ئه‌م كردارانه ئه‌گه‌ر ده‌ركه‌وت ئایه‌ر فلۆكه خراپ بووه ئه‌وه ده‌بێت بگۆڕێت.
MAP = Manifold absolute pressure
MAF = Mass Air Flow
نوسیینی دانا كریم
ماسته‌ر له ئه‌ندازیارى میكانیك